الموج محاصر السفينة..محمد حبشي / مصر

 1-  الموج محاصر السفينة ، أحقاد دفينة ، 

إتشَكِلِت وحش براسين ، 

شكله غريب ،  

وما بين قوسين ، الموت قريب ، 

وع المدى شايفين غَرَق ..

قلبي انحرق ،

على طفل 

يشبه الحسين ، 

حلمه ضاع ، عمره انسرق ..

.

.

2-  الموج محاصر السفينة ، طب حد فينا ، 

عنده نخوة ، شهامة ، ذوق ..

يعرف يجدف ، 

أو يسوق ؟..

بإيد متينة ، يلف بينا ، 

يرجع تاني 

للمدينة ، 

أو يرسى بينا في أي مينا ، 

تكون أمينة ، 

واللي 

حامينا ، 

ما يقطع فيها يوم 

لسانَّا ، أو يربط فيها يوم إيدينا ..

.

.

3-  الموج محاصر السفينة ، طب حد فينا ،

إسمه نوح ..

عاش مآسي ، شاف جروح ؟..

مش شرط يعني 

يكون نبي ، 

أهم حاجة يكون طموح ..

عنده قلب ، 

وألف روح ..

ويكون ظريف ، إنسان شريف ، 

ما يكونش سفاح ، 

أو غبي ..

ووقت اللزوم ، يرميلنا طوق ، 

نقدر نعوم ، ونقب فوق ..

نحلم نعيش ، 

من غير مفيش ، 

أو حرام من شيخ ، أو أبي .. 

يمكن أفوق ، 

من النفوق ، 

من الخمور والحشيش ، 

يطلع لي ريش ، واعلن بجرأة مذهبي ..

.

.

4-  الموج محاصر السفينة ، طب حد فينا ،

عنده صوت ، 

ولَّا خلاص 

يا ناس يا بُكم ، 

رضينا حُكم ، فلسفته موت ..

طب حد فينا 

له وريث ، 

يدْعِي بَدَالنا ويستغيث ؟..

واحد تقي ، 

قلبه نقى ..

قال ربك مُعِين ، هو المُغِيث ..

لكن لِسَانُه كان خبيث ..

قال ب شوق ، 

ربك كبير .. قادر نفوق ،  

ويسيبنا تحت ، وياخده فوق ..

قلنا له مين ؟.. 

بص وضحك ، وقال آمين ..

                    محمد حبشي/ (1-2-2019) - 12:35 صباحا..