محاولات زجلية ...بقلم لبنى المانوزي / المغرب

محاولات زجلية
..................

الزربية عواجت


وما بقاو ا فقية


الشمعة اللي بجنب الواد


ثقبوا ليها عينيها


ساعة فاض الما


وكلشي عرف المعنى


...............................

تحت الناعورة شلة كلام


مايبان غير للي جاو


من ذيك السما االلي تحت القلب


عشرة ديال البيبان


في كل ليلة كيتحلوا


في غشاه


باش الملايكة


يغربلوا الكلام


شي تبن


شي ذهب


وشي بين وبين


...............................
عين الشمس جرحها قادوس


كلت نخيطها بثلات غرزات


الغرزة الأولى


نجمة قبل ما تولي غبار


الغرزة التانية


حكمة المجذوب قبل ما يحماق


الغرزة الثالتة سرقوها من بين عيني

....................................................

طعريجتنا ولات عريجة


منين شدوا بيبان الما


في حلقنا نشفات شجرة الكون


مابقا السين ولا النون


ولات الورقة


جيفة معلقة


..............................................


جوج وراق


بلا كدم


بلا كفا


بلا زريعة فكتاب


تروي عطش التيلاد الادوا


هما أنا وانتا


على باب الما


نتسناو النوبة


يجيوا في الجذبة


ويدردبونا أنا وانتا


حيث احنا ماشي مالين الليلة


الشمع وأتاي


اللوز والحباق


ديال مالين الدار


أما ساروتنا أنا وانتا


بلعته الجيفة

...........................................


مازال قلبي صافي


على عهد المحبة راسي


واقفة نبقى


حتى ولو هرسوا محراثي


ما يهمني الدود اللى كلاني


من راسي حتى لساسي


مادامت الشمس هي مرادي


الدوا راني لقيته في دواتي


وفي عروقي مجذوب الكرمة


فاق ودوا


وبخيوطه الزرقة


شد حبالي للسما