أَنَا وْ لَحْمارْ كْبرْنا خُّوتْ بقلم مصطفى الحناني المغرب

أنا والحمار كبرنا خُّوت فالْبليه

أنا بْليتي
وجع ، وهم وكيّةْ شلّه اخُّوتْ
وهو ..
ايه هو بليتو بردعه اومسحه أوقوتْ
لحمار شتيمة وسبة من دار لدار تفوت
وأنا نعت ومنعوت بالكدار حتى للموت

أنا والحمار ...!
كبرنا خوت فالدنيا
منين كنت صغير علموني
" التكرار يعلّم لحمار "
كرّرت وتعلمت شلّه قضيّه
تعلّمتْ ...
باللي لحمار كان جحش درويش
وباللي أنا تكويت بنفس الميش
أو باللي لبلاد كيف لمرا عوره
خيراتها بالأطنان مكوره
لبلاد او لمرا جاو للدنيا في مره
التفاح
خماجت ريحته وطعمته صارت مُرّه
وأنا
يا خيتي لمرا قضيتك في قلبي جمره
نعتوني بالغاوي
هذاك غير سكايري فلقهاوي

أنا والحمار
كبرنا خوت وفات فينا الفوت
هو ينعق فالصباح وتحته الروث
أوفالليل يشهگ شهگات الموت
وأنا
أنا اللي كنت نظن الفرح قريب
هزيته مع رفاگت المِحنة شعار غريب
كنت نظن
الحالة فايتة والسوايع بدالة
ساعة تفرشنا عمرنا كسالى
وتغطينا بالوهم
والوهم خيش أو دربالة

الحمار خويا
هو رضع همّه من أمه
وأنا
همي رضعت من جد بويا وعمّه

لحمار رفيگ حزين ...
تلفن لي فالحين
ورخى وذنيه أو سرواله
او گال الحالة عيانه
آلو آلو الو
فينك تگعّد مابيك والو
ياك گلتلك
گاع الللي قرا خرا في سروالو
اييييه اللي قرا ...!
طول حياته يقلب على مراه
ولمراه تمره
عصروا نهودها خمره
وهي مليوحه برا فالسّمره..
تگعد لحمار خويا ورمى وذنيه لبرا
أو صرخ فيا أو گال
سمعني مزيان هاذ المره
أولا
تعيد سري لمدّاح ذليل على كل شي عرّا
أنا خوك كيفما گلت أنت ديك المرّه
والخو لخوه صديق فالحزه والضيق
ونعاودلك سوالفي كيف لخرافة تليق
أنا خوك والحمار نشف من جوفه الريق
شحال من خطره نهقت أو گلتلك فيق أوعيق
لكن أنت .. ايه أنت
راسك قاسح ما تفيّْضك غير النار كي لبريق
فوقاش يا خويا بنادم ترجع ونشدو الطريق
فيق أو عيق فيق أوعيق
باراكا عليك من الشهيق
أنا لحمار وانت لي الرفيق
الله يفگدنا بالشهادة ....